მიზნები & ამოცანები

• შედეგი 1.1. სამოქალაქო თვითმობილიზაციისა და დიალოგის მექანიზმები

მოქმედებს მულტი-აქტორული საზოგადოებრივი ასამბლეა, რომელიც წარმოადგენს საზოგადოების სხვადასხვა ჯგუფებს შორის ნდობის აღდგენის, დიალოგისა და თანამშრომლობის პლატფორმას.

ასამბლეის მხარდაჭერით შექმნილია საზოგადოების თვითმობილიზაციის, სოლიდარობისა და მოქალაქეების პოლიტიკურ პროცესებზე მშვიდობიანი ზემოქმედების მდგრადი მექანიზმები. ეს მექანიზმები ხელს უწყობს სამართლიანი არჩევნების ჩატარებისთვის, რეპრესირებულ აქტივისტთა მხარდაჭერისთვის და პოლიტიკური მოტივით დაკავებულთა გათავისუფლებისთვის საჭირო საზოგადოებრივ ძალისხმევას, მშვიდობიან, სამოქალაქო წინააღმდეგობას; მხარდაჭერას უწევს ახალი საზოგადოებრივი ჯგუფებისა და საკომუნიკაციო პლატფორმების ფორმირებას, მათ შორის ეფექტურ თანამშრომლობას. ასამბლეა ავითარებს ობიექტური ინფორმაციის გავრცელებისა და დეზინფორმაციასთან ბრძოლის მექანიზმებს.

• შედეგი 1.2. არჩევნების მოდელი

ფართო საზოგადოებრივი კონსენსუსის საფუძველზე შექმნილია არჩევნების ჩატარების მოდელი, რომელიც პასუხობს საქართველოს რეალობასა და მიმდინარე გამოწვევებს. იგი აღწერს საარჩევნო ეკოსისტემას, რომელიც მოიცავს ყველა საჭირო პროცესს, ინსტიტუციას და აქტორს, რომლებიც გავლენას ახდენენ არჩევნების სამართლიანად ჩატარებაზე.

მოდელი უზრუნველყოფს საარჩევნო პროცესის მიმართ ნდობის გაჩენას და განსაზღვრავს ინსტიტუციურ გარემოს, სადაც მოქალაქეები თავისუფლად გამოხატავენ საკუთარ ნებას, ხოლო ხელისუფლების ცვლა მშვიდობიანად და სამართლიანად ხდება.

• შედეგი 1.3. ტრანზიციის საგზაო რუკა
  განსხვავებული საზოგადოებრივ-პოლიტიკური ძალების დიალოგის საფუძველზე შექმნილია მშვიდობიანი ტრანზიციის საგზაო რუკა, რომელიც მოიცავს კონკრეტულ ნაბიჯებს პოლიტიკური კრიზისიდან გამოსვლისთვის. ეს რუკა განსაზღვრავს გზას, რომელიც მიმართულია კრიზისის დეესკალაციისკენ, პოლარიზაციის შემცირებისა და მოქალაქეთა შორის ნდობის აღდგენისკენ.

ამ პროცესის მიზანია მყარი და ფართო კონსენსუსის საფუძველზე დემოკრატიული ინსტიტუტების გაძლიერება და სტაბილური გარემოს წინაპირობების შექმნა, რომელიც ხელს შეუწყობს ქვეყნის მშვიდობიან ტრანსფორმაციას, კონსტიტუციური ჩარჩოს აღდგენასა და საქართველოს ევროინტეგრაციის გზაზე დაბრუნებას.

• შედეგი 2.1. საერთაშორისო მხარდაჭერის გაძლიერება
  საქართველოს დემოკრატიული ტრანსფორმაციის პროცესში საერთაშორისო მხარდაჭერის გაძლიერების მიზნით საერთაშორისო პარტნიორებთან თანამშრომლობის მექანიზმები ფორმირებულია. ისინი უზრუნველყოფენ ამ პროცესში მხარდამჭერი ქვეყნების, საერთაშორისო ორგანიზაციებისა და საერთაშორისო საზოგადოების აქტიურ ჩართულობას, მათი პოზიტიური როლისა და გავლენის გაძლიერებას, რაც ამ ეტაპზე კრიტიკულად მნიშვნელოვანია საქართველოს დემოკრატიული განვითარებისთვის.
  
  

• შედეგი 2.2. ევროატლანტიკური ინტეგრაციისთვის საჭირო რეფორმების პროექტების შემუშავება
  განსხვავებული საზოგადოებრივ-პოლიტიკური ძალების დიალოგის საფუძველზე შექმნილია მოდელები და რეფორმების პაკეტები, რომლებიც ხელს უწყობს საქართველოს ევროატლანტიკურ სტრუქტურებში ინტეგრაციისა და გაწევრიანებისათვის საჭირო მდგრადი ინსტიტუციური წინაპირობების შექმნას. ამ მოდელებსა და რეფორმების პროექტებში გათვალისწინებულია არსებული პოლიტიკური და ეკონომიკური რეალობა, რათა უზრუნველყოფილ იქნეს საქართველოს წარმატებული გზა ევროპული და ევროატლანტიკური სტრუქტურებისკენ.

• შედეგი 3.1. კონსტიტუციის მოდელ(ებ)ი

უზრუნველყოფს ძალაუფლების ბალანსს, სუბსიდიარობას და დეცენტრალიზაციას. ის მიზნად ისახავს სახელმწიფოს კონსტიტუციური ჩარჩოს განვითარებას, სადაც იქნება დაცული მოქალაქეთა ფუნდამენტური უფლებები, მათი მრავალფეროვნება და თვითრეალიზაციის შესაძლებლობები, რაც მინიმუმამდე ამცირებს ძალაუფლების კონცენტრაციას ერთ წერტილში. აღნიშნული მოდელი უზრუნველყოფს საქართველოს შიდა სტაბილურობას, ხოლო ოკუპირებული ტერიტორიების რეინტეგრაციის შემდეგ, ადგილობრივი თემების მშვიდობიანი თანაცხოვრების ინსტიტუციურ მექანიზმებს, თითოეული მოქალაქის ინდივიდუალური მულტი-იდენტობის საფუძველზე.

ძალაუფლების გადანაწილების, დეცენტრალიზაციისა და სუბსიდიარობის პრინციპებზე დაფუძნებით, ფორმირდება მძლავრი ადგილობრივი მმართველობა, დამოუკიდებელი და თავისუფალი სასამართლო, ასევე, პარტიული გავლენისგან თავისუფალი ძალოვანი და საჯარო სამსახური. ეს პროცესი ხელს უწყობს დემოკრატიული ინსტიტუტების გაძლიერებას, სამოქალაქო ჩართულობასა და საზოგადოების მდგრადობას.

• შედეგი 3.2. თანამედროვე საჯარო მმართველობა (GovTech/DeGov)

თანამედროვე საჯარო მმართველობის სისტემა, რომელიც დაეყრდნობა GovTech-ის და DeGov-ის პრინციპებს, მოიცავს საჯარო სექტორში თანამედროვე მიდგომების, დეცენტრალიზებული ტექნოლოგიების, მონაცემთა და ინოვაციების ინტეგრაციას. ეს ხელს შეუწყობს მმართველობის გამჭვირვალობას, მოქალაქეთა აქტიურ ჩართულობას და ეფექტიანობას. 

სისტემის მოდელი მოიცავს მძლავრი მმართველობის ინსტრუმენტების ფორმირებას, რომლებიც უზრუნველყოფს საჯარო სექტორის ციფრულ ტრანსფორმაციას, კერძო-საჯარო პარტნიორობით ეფექტიანობის ზრდას და ხელს უწყობს საჯარო გადაწყვეტილებების უფრო მაღალ ხარისხს, ინკლუზიურობას, ანგარიშვალდებულობას და მოქალაქეებთან ურთიერთობის გაუმჯობესებას, მინიმუმამდე დაყავს კორუფციის რისკები.

• შედეგი 3.3. საქართველოს განვითარების სტრატეგიები და პოლიტიკები

განსხვავებული ინტერეს-ჯგუფების ფართო მონაწილეობით შემუშავებული მულტისექტორული ინტეგრირებული სტრატეგია მოიცავს საქართველოს სუვერენიტეტისა და უსაფრთხოების, ასევე სხვა სექტორების განვითარების ხედვებსა და პოლიტიკებს. სტრატეგია ეფუძნება მულტი-აქტორულ და ინტერ-სექტორულ მიდგომას, რაც უზრუნველყოფს ქვეყნის სხვადასხვა სექტორის მიმართ გამართული და კოორდინირებული პოლიტიკის ჩამოყალიბებას.

ამ მიდგომამ ხელი უნდა შეუწყოს საქართველოს ინკლუზიურ და სტაბილურ განვითარებას, ასევე დემოკრატიული მმართველობის ფორმირებას, რომელიც ანგარიშვალდებული და ეფექტური იქნება. საბოლოო მიზანია, ქვეყნის სრულფასოვანი ინტეგრაცია საერთაშორისო სისტემაში, მისი როლის გაძლიერება და საერთაშორისო საზოგადოებაში საქართველოს მნიშვნელოვანი კონტრიბუტორის სახით წარმოჩენა.