განცხადება - ადგილობრივი თვითმმართველობის არჩევნები

საქართველოს საზოგადოებრივი ასამბლეის ჯგუფების განცხადება 2025 წლის ადგილობრივი თვითმმართველობის არჩევნებთან დაკავშირებით

საქართველოს საზოგადოებრივი ასამბლეის ჯგუფები — მათ შორის, ქუთაისის საზოგადოებრივი ასამბლეა, მცხეთის საზოგადოებრივი ასამბლეა, რეგიონების ინტერეს ჯგუფი, აშშ ემიგრანტების ინტერეს ჯგუფი - GeoVoice USA, კულტურის ინტერეს ჯგუფი, ადვოკატების და იურისტების ინტერეს ჯგუფი, კულტურული მემკვიდრეობის ინტერეს ჯგუფი უერთდებიან საზოგადოებრივი ორგანიზაციების,  პოლიტპატიმართა ოჯახის წევრების და რვა პოლიტიკური გაერთიანების ერთობლივ პოზიციას და გამოთქვამენ მწვავე კრიტიკას არჩევნების პროცედურებთან დაკავშირებით.

დეტალურმა ანალიზმა და პრაქტიკულმა გამოცდილებამ აჩვენა, რომ მოქმედ საარჩევნო სისტემაში არსებობს ფუნდამენტური ხარვეზები, რომლებიც სისტემურად ზღუდავს სამართლიანი და თავისუფალი არჩევნების ჩატარების შესაძლებლობას. აღნიშნული ხარვეზები სრულ თანხვედრაშია ადგილობრივი და საერთაშორისო სადამკვირვებლო ორგანიზაციების შეფასებებთან.

ამ პირობებში შეუძლებლად მიგვაჩნია მიმდინარე პროცესის ლეგიტიმური არჩევნების სტატუსით აღიარება. მიგვაჩნია, რომ აღნიშნული ფორმით ჩატარებული არჩევნები ძირს უთხრის დემოკრატიულ პროცესებს და წინააღმდეგობაში მოდის ქვეყნის კონსტიტუციასთან.

ჩვენ მოვუწოდებთ საზოგადოებას და პოლიტიკურ სუბიექტებს, გამოხატონ საჯარო პოზიცია იმაზე, წარმოადგენს თუ არა მიმდინარე პროცესი რეალურ არჩევანს. საზოგადოებრივ ასამბლეას აქვს კონკრეტული წინადადება – რა პირობებში შეიძლება ჩაითვალოს არჩევნები სამართლიანად. მზად ვართ გავუზიაროთ საზოგადოებას ეს ხედვა და ჩავერთოთ საჯარო დისკუსიაში.